بہت پر لطف گو اردو زباں ہے

بہت پر لطف گو اردو زباں ہے 
مذکر اور مونّث کی ہے دقّت

حجاب و پردہ گھونگھٹ اور برقع
مذکر ہے یہ کل سامانِ عورت

مونث ہے جناب شیخ کی ریش 
ہو کچھ بھی اس کی مقدار و طوالت

مذکر ہو گیا گیسوئے جاناں 
ہوئی اس کی طوالت کی یہ عزّت

دُوپٹّہ عورتوں کا ہے مذکر
مونث کیوں ہے دستارِ فضیلت

فراق و وصل ہیں دونوں مذکر
مونث ہے مگر واعظ کی صحبت

ہوئیں جب مونچھ اور داڑھی مونث
تو پھر کرنا پڑا دونوں کو رخصت